క్రికెట్‌కే కాదు, షూటింగ్‌లకు కూడా వర్షం దెబ్బ తగులుతోంది. అనుకున్నచోట షూటింగ్‌ చేయకుండా మరోచోట చేయడం పరిపాటే. తాజాగా వెంకటేష్, శ్రీకాంత్ నటిస్తోన్న షాడో చిత్రానికి వానదెబ్బ తగిలింది. యునైటెడ్‌ మూవీస్‌ పతాకంపై నిర్మిస్తున్న చిత్రం 'షాడో'. మెహర్‌ రమేష్‌ దర్శకత్వంలో పరుచూరి కిరిటీ చిత్రాన్ని నిర్మిస్తున్నారు. ముంబైలో షూటింగ్‌ జరగాల్సి ఉండగా బాగా వర్షాలు కురుస్తుండటంతో వాతావరణం అనుకూలించక పోవడంతో అక్కడ షూటింగ్‌ రద్దు చేసి నేరుగా మలేషియా షెడ్యూల్‌కు సన్నాహాలు చేస్తున్నారు. జులై రెండో వారంలో మలేషియాలో షూటింగ్‌ ప్రారంభంకానుంది.
ఇంతకుముందు ఈ చిత్రం షూటింగ్‌ హైదరాబాద్‌, స్విట్జర్లాండ్‌ ప్రదేశాల్లో నిర్వహించారు. ఇందులో వెంకటేష్ ఇంటర్నేషనల్‌ డాన్‌గా కన్పిస్తారు. యాక్షన్‌ థ్రిల్లర్‌గా రూపొందుతున్న ఈ చిత్రానికి కోన వెంకట్‌, గోపీమోహన్‌లు స్క్రిప్ట్‌ అందిస్తున్నారు. హీరో శ్రీకాంత్ ముఖ్యమైన పాత్రను పోషిస్తున్నారు. శ్రీకాంత్ సరసన మధురిమ నటిస్తోంది. ఈ చిత్రానికి తమన్‌ సంగీతం అందిస్తున్నారు. ఈ చిత్రంలో కామెడీ మెండుగా వుంటుందని నిర్మాత తెలియజేస్తున్నారు. సినిమా పేరుకు తగినట్లుగానే మాఫియా బ్యాగ్రౌండ్‌తోపాటు ఎంటర్‌టైన్‌మెంట్‌ ఎలిమెంట్స్‌ ఉంటాయని ఆయన తెలిపారు.
Post a Comment