‘ద డర్టీ పిక్చర్’ వసూళ్లు రూ. 70 కోట్లు

విద్యా బాలన్ హీరోయిన్‌గా నటించిన ‘ద డర్టీ పిక్చర్’ సినిమా బాక్సాఫీస్ వద్ద కలెక్షన్ల వర్షం కురిపిస్తోంది. విడుదలైన తొలి రెండు వారాల్లోనే రూ. 70 కోట్ల షేర్ సాధించి, సంచలనం సృష్టించింది. టాప్ బాలీవుడ్ హీరోల సినిమాల తరహాలో ఈ సినిమా చేస్తున్న కలెక్షన్ల మ్యాజిక్‌కి ట్రేడ్ వర్గాలే ఆశ్చర్యపోతున్నాయి. రూ. 70 కోట్లలో తొలి వారం వసూళ్లే రూ. 52 కోట్లు కావడం గమనార్హం.
నజీరుద్దీన్ షా, ఇమ్రాన్ హష్మి, తుషార్ కపూర్ ప్రధాన పాత్రలు పోషించిన ఈ చిత్రానికి మిలన్ లూథ్రియా దర్శకుడు. ఏక్తా కపూర్ నిర్మించిన ఈ చిత్రంలో విద్య పోషించిన రేష్మ పాత్ర, ఆ పాత్రలో ఆమె నటన ప్రేక్షకుల్ని అమితంగా ఆకట్టుకుంటున్నాయి. ఫలితంగా ఇప్పుడు కేవలం బాలీవుడ్ మాత్రమే కాక దేశవ్యాప్తంగా యువతరం ఆరాధ్య తారగా మారిపోయింది విద్య.